Imibereho Inkuru nyamukuru

Musanze: Yanze guha umwana we amaraso hitabazwa ubuyobozi

Mu bitaro bikuru bya Ruhengeri tariki 20 uku kwezi hagejejwe umubyeyi witwa Yambabariye azanywe na Gereza ya Musanze aho afungiye ahita abyara umwana udashyitse ku mezi arindwi, uyu mwana wari ugeramiwe byabaye ngombwa ngo akenera guterwa amaraso kandi umutabazi wa mbere yari nyina. Gusa yarabyanze aratsemba kugeza ibitaro byitabaje ubuyobozi….

Yambabariye yumvaga adakwiye guha umwana we amaraso ngo amutabare

Yambabariye yumvaga adakwiye guha umwana we amaraso ngo amutabare

Kuri uyu wa 27 Kamena nibwo yemeye guha umwana we amaraso ariko asigara avuga ko ashobora kutamwonsa. Ubu abaganga baratanga ikizere ko uyu mwana niyonka neza azakomeza akabaho.

Uyu mwana wa gatatu wa Yambabariye yavukanye 1,3Kg.

Yambabariye avuga ko imyemerere ye yo mu idini y’Abayehova imubuza gutanga amaraso ku uyakeneye nubwo yaba umwana we nk’uko yabibwiye Umuseke.

Ati “Nemera ko kubwa Yehova wamumpaye, we  yari azi neza ko agomba kubaho, imyumvire yo kumuha amaraso numvaga itandimo kuko ntawe byabuza ubuzima ngo ni uko atongerewe amaraso kandi Yehova azi uko azabaho”

Uyu mwana we nyamara yari amaze icyumweru ubuzima bwe buri mu kaga kuko yari akeneye amaraso. Yambabariye ariko we avuga ko iyo bitaba kubisabwa cyane n’ubuyobozi atari kuyamuha.

Kubwe kongerera umuntu amaraso ngo si ubushake bwa Yehova kuko ngo Yehova wemeye ko avuka adashyitse yari no kumufasha akabaho bitabaye ngombwa ko ahabwa amaraso na nyina.

 

Abandi ntibumva uburyo umuntu yemera kwihekura

Ababyeyi barwariye n’abarwarije kuri ibi bitaro bya Ruhengeri bagaye uyu mugenzi wabo wari ugiye kwihekura ngo ntiyaha umwana we amaraso kandi nawe yazanywe kwa muganga ngo atabarwe.

Alice Mutuyimana urwaje umubyeyi we aha ati “Ibi byo ntabwo ari byo umwana wagiriye ku gise uba ugomba kumwitaho uko bishoboka kose. Imyemerere yo kudakiza ubuzima bw’umuntu se ni bwoko ki?”

Undi mugenzi we utifuje gutangazwa amazina ati “Ibi ni amahitamo hagati y’icyo umuntu aha agaciro hagati y’imyemerere n’umwana we. Ariko ntibyumvikana uko wabyara umwana bagusaba ko umwongerera amaraso ukabyanga.”

 

Ubuyobozi ngo ntibwari kureebeera

Marie Claire Uwamariya Umuyobozi w’akarere ka Musanze wungirije ushinzwe imibereho myiza avuga ko bitabajwe n’ibitaro baje kureba basanga ko gahinja kanegekaye maze bafata umwanya baganira na nyina bamusaba ko yemera gukiza umwana we.

Uwamariya ati “Twamuganirije, atubwira ko imyemerere y’idini ye itemera ko umwana we yahabwa amaraso, twagerageje kumwumvisha ko umwana ari igihugu cy’ejo hazaza kandi ko n’ubuzima bwe bugomba gusigasirwa, yaje kubitwemerera umwana barayamwongerera.”

Uyu muyobozi avuga ko bazakomeza gukurikirana imibereho y’uyu mwaka kugira ngo atazamburwa uburenganzira bwe.

Yambabariye akomoka mu karere ka Rulindo, afungiwe muri gereza ya Musanze aho yahamijwe n’Urukiko icyaha cyo gucuruza ibiyobyabwenge (urumogi) agakatirwa gufungwa imyaka itatu ubu akaba amaze amezi atanu afunze.

Emile DUSENGE