Inkuru nyamukuru Iterambere

Gisagara: Abagore baba mu Nteko batanze inka 76 ku batishoboye

Kuri uyu wa gatanu Ihuriro ry’Abagore bari mu Nteko Ishinga Amategeko y’u Rwanda (FFRP) bagiye mu karere ka Gisagara mu mirenge y’icyaro ya Kibirizi na Mamba aho baroje inka 76 imiryango itishoboye, batanga ibikoresho by’isuku ku bana b’abakobwa banakorana umuganda n’abaturage. Ni mu rwego rwo kwizihiza imyaka 20 iri huriro rimaze.

Imiryango myinshi itishoboye yorojwe inka ngo zihindure ubuzima bwabo

Imiryango myinshi itishoboye yorojwe inka ngo zihindure ubuzima bwabo

U Rwanda rufite umuhigo kw’isi wo kuba rufite abagore benshi mu Nteko Ishinga Amategeko aho Abanyarandakazi bari mu Nteko bagera kuri 64%.

Iri huriro ry’intumwa za rubanda ryifuje kwizihiza isabukuru y’imyaka 20 mu karere ka Gisagara, riremera imiryango itishoboye ribaha inka, ritanga ibikoresho byo munzu, ryubaka uturima tw’igikoni, rinifatanya n’abaho mu mugoroba w’ababyeyi n’ibindi…

Uyu munsi baherekejwe na Guverineri w’Intara y’Amajyepfo, bahatanze inka 55 mu murenge wa Mbamba na 21 mu murenge wa Kibirizi ku miryango itishoboye kugira ngo zibafashe kubona amata n’ifumbire.

Izi nka buri imwe ifite agaciro k’amafaranga ibihumbi bigera kuri Magana atandatu nk’uko byasobanuwe.

Bafatanyije n’abaturage gusiza ikibanza kizubakwamo amashuri mu murenge wa Mamba ahari umudugudu w’ikitegererezo.

Batanze kandi ibikoresho by’isuku ku bana b’abakobwa 200 biga mu mashuri yisumbuye.

Aba badepite n’abasenateri batanze ibigega 10 by’amazi mu mudugudu wa Ruhuha mu kagari ka Gakoma bifite agaciro ka miliyoni icyenda z’amanyarwanda.

Hon Anita Mutesi Perezidante wa FFP yavuze ko baje kwizihiza isabukuru yabo hano biri no mu rwego rwo gufasha aka karere gafite imbogamizi nyinshi mu iterambere ku bagatuye.

Hon Donatille Mukabalisa Perezidante w’Inteko Ishinga Amategeko umutwe w’Abadepite yasabye abaturage gufatikanya mu iterambere no kugira umuco wo korozanya kugira ngo bafashanye gutera imbere.

Umunsi mukuru w’isabukuru ya FFRP uraba kuri uyu wa gatandatu tariki 10 Kamena muri Gymnase nshya y’Akarere ka Gisagara.

Hon Mukabalisa atanga ibikoresho by'isuku ku bakobwa

Hon Mukabalisa atanga ibikoresho by’isuku ku bakobwa

Batanze inka 76 zose hamwe. Aha ni hafi y'umudugudu w'ikitegererezo uri kubakwa i Mamba

Batanze inka 76 zose hamwe. Aha ni hafi y’umudugudu w’ikitegererezo uri kubakwa i Mamba

Hon Mukabalisa ashyikiriza inka abaturage

Hon Mukabalisa ashyikiriza inka abaturage

Mu karere ka Gisagara

Mu karere ka Gisagara

Mu mirenge ya Mamba na Kibirizi aho FFRP yafashije abatishoboye

Mu mirenge ya Mamba na Kibirizi aho FFRP yafashije abatishoboye

Christine NDACYAYISENGA