Imikino

Allioni yizihije isabukuru y’amavuko afasha imiryango itatu y’incike za Jenoside

Mu mudugudu w’Imena, Akagali ka Bibabare, nu Murenge wa Kimironko ahasanzwe hubatswe umudugudu wa AVEGA niho imiryango Allioni yafashije ituye.

Umwe mu basuwe ashyikirizwa urupfuko bamuzaniye
Umwe mu basuwe ashyikirizwa urupfuko bamuzaniye

Kuri uyu wa kabiri tariki ya 23 Ugushyingo 2016, nibwo Allioni yuzuzaga imyaka 24 y’amavuko. Aho gushaka aho yizihiriza uwo munsi we, ngo yahisemo kugira igikorwa akora ashimira Imana yamurinze.

Ahitamo kuba yajya gufasha iyo miryango mu buryo bwo kuyiba hafi, anashimira Imana yamuhaye ubushobozi bwo gufasha iyo miryango.

Bernadette ufite imyaka 92, Mukagatanazi Judithe ufite imyaka 82 na Mukansanga Bonifrida ufite 67 nibo Allioni  yifatanyije nabo ku isabukuru ye.

Uretse kuba abo bakecuru bose bari mu kigero cy’izabukuru, banafite ubumuga butandukanye basigiwe na Jenoside yakorewe Abatutsi mu 1994.

Allioni yabwiye Umuseke ko kuba yaratekereje icyo gikorwa biri mu bintu yari amaranye igihe mu byifuzo bye ari nako asaba Imana ubushobozi bwo kuzabimugezaho.

Avuga ko nubwo hari indi miryango yagiye agaragara mu bikorwa byo kuyifasha bitamunezezaga kuba atari we bwite ubikoze kubera ko ari ibintu yari afite mu mihigo ye.

Ngo hari benshi mu rubyiruko bakwiye kujya batekereza kuri bagenzi babo batameze neza aho kumva ko basa n’abari ku Isi yabo, bagomba kwinezeza gusa.

Uhagarariye umuyobozi w’umurenge wa Kimironko, avuga ko muri uwo mudugudu wa AVEGA ubusanzwe ufite imiryango 400.

Muri iyo miryango, ingo zigera ku 185 ni iz’abapfakazi n’imfubyi. Indi miryango ikaba ari iyagiye iza kuhatura iturutse hirya no hino.

Allioni yujuje imyaka 24 y’amavuko
Allioni yujuje imyaka 24 y’amavuko

Joel Rutaganda
UMUSEKE.RW